Սպիտակ տունը հայտարարել է, որ Թրամփն այսօր Իրանի հարցով Ազգային անվտանգության խորհուրդ է հրավիրել:
Իրանի պետական հեռուստատեսությունը կոչ է արել ժողովրդին հեռացնել WhatsApp հաղորդագրությունների հարթակը իրենց հեռախոսներից՝ պնդելով, որ հավելվածը հավաքագրում է տեղեկություններ՝ Իսրայել ուղարկելու համար։ Հեռուստաընկերությունը որևէ կոնկրետ ապացույց, սակայն, չի ներկայացրել։
WhatsApp-ը այս պնդումները կեղծ է որակել և նշել՝ «մտահոգիչ է, որ դրանք մեր ծառայությունների արգելափակման պատրվակ կդառնան մի փուլում, երբ մարդիկ դրանց կարիքն ամենաշատն ունեն»։
Իսլամական հեղափոխության պահապանների կորպուսը (ԻՀՊԿ) հայտարարել է՝ Իրանը ուղերձ է հղել Միացյալ Նահանգներին՝ նոր առաջադեմ հրթիռներով հարվածելով Իսրայելի թիրախներին, հայտնում է IRNA գործակալությունը։
ԻՀՊԿ-ն մամուլի հաղորդագրություն է տարածել չորեքշաբթի վաղ առավոտյան՝ նշելով, որ վերջին հարվածների ժամանակ օգտագործվել են «Ֆաթահ» հրթիռների առաջին սերնդի մոդելները, որոնք բազմիցս հաղթահարել են Իսրայելի հակահրթիռային պաշտպանության համակարգերը և «փոխանցել են Իրանի հզորության ուղերձը Թել Ավիվի պատերազմասեր դաշնակիցին, որն ապրում է պատրանքային ցանկությունների մեջ»։
«Այս գիշերվա հրթիռային հարվածը ցույց տվեց, որ մենք ամբողջությամբ վերահսկում ենք օկուպացված տարածքների օդային տարածքը, որոնց բնակիչները լիովին անպաշտպան են Իրանի հրթիռային հարվածների դեմ», - հայտարարել է ԻՀՊԿ-ն։
Նախօրեին ԱՄՆ նախագահը կտրուկ սրեց իր հռետորաբանությունը Իրանի գերագույն առաջնորդի հասցեին՝ սոցիալական ցանցում հայտարարելով, որ Ամերիկան գիտի՝ որտեղ է նա այժմ գտնվում, բայց «առայժմ» չի սպանի նրան։
Իրանի նախագահ Մասուդ Փեզեշքիանը հայտարարում է, որ Իսրայելն անտեսում է բոլոր միջազգայնորեն ընդունված կանոնակարգերը՝ զգուշացնելով, որ տարածաշրջանը կարող է երբեք կայուն խաղաղություն և անվտանգություն չտեսնել, եթե Իսրայելի ագրեսիան շարունակվի։
Երեքշաբթի օրը ԱՄԷ նախագահ Մոհամեդ բին Զայեդ Ալ Նահյանի հետ հեռախոսազրույցի ժամանակ նախագահ Փեզեշքիանն ասել է, որ սկզբից ինքը ձգտել է միասնության և համերաշխության՝ ինչպես երկրի ներսում, այնպես էլ արտասահմանյան երկրների հետ համագործակցությամբ։
Այնուամենայնիվ, նա նշել է, որ Թեհրանում «Համաս»-ի առաջնորդ Իսմայիլ Հանիեի սպանությամբ Իսրայելի ռեժիմը փորձել է խոչընդոտել Իրանի խաղաղության ջանքերը։
Իսրայելի ռազմաօդային ուժերի ինքնաթիռները Թեհրանում հարվածել են ցենտրիֆուգների արտադրության կայանին և զենքի գործարաններին, հայտնում է Իսրայելի պաշտպանության բանակը:
Զինվորականները հայտնում են, որ ավելի քան 50 ինքնաթիռ մասնակցել է գիշերային գործողություններին, որոնք ներառում էին հարվածներ իրանական ցենտրիֆուգների արտադրության կայանին և մի քանի զենքի արտադրության օբյեկտներին։
Իսրայելի պաշտպանության բանակը նշում է, որ Թեհրանում գտնվող ցենտրիֆուգների արտադրության կայանն օգտագործվել է Իրանի կողմից՝ միջուկային զենք մշակելու նպատակով ուրանի հարստացման ծավալը և արագությունը ընդլայնելու համար։
Իսրայելի պաշտպանության նախարար Իսրայել Կացը X-ի իր էջում գրել է. - «Թեհրանի վրայով անցնում է տորնադոն։ Իշխանության խորհրդանիշները ռմբակոծվում և փլուզվում են՝ հեռարձակող մարմնից մինչև շուտով այլ թիրախներ, քանի որ բնակիչների զանգվածները փախչում են։ Ահա թե ինչպես են տապալվում բռնապետությունները»։
Իսրայելի օդային հարվածների հետևանքով Իրանում ևս երկու միջուկային օբյեկտ է տուժել։ Այս մասին այսօր հայտարարել են Ատոմային էներգիայի միջազգային գործակալության ներկայացուցիչները։
Նրանց խոսքով՝ տուժած հաստատություններից մեկը ուրանի հարստացման համար նախատեսված ցենտրիֆուգեր արտադրող ТЕSA գործարանն է, որ գտնվում է Քարաջ քաղաքում, մյուսը՝ Թեհրանի հետազոտական կենտրոնը։
«Քարաջում երկու շինություն է վնասվել, Թեհրանում՝ մեկը», - X-ի պաշտոնական օգտահաշվում տեղեկացրել է գործակալությունը։
Ռուսաստանի փոխարտգործնախարար Սերգեյ Ռյաբկովը զգուշացրել է, որ ԱՄՆ-ի կողմից Իսրայելին ուղղակի ռազմական օգնությունը կարող է արմատապես անկայունացնել իրավիճակը Մերձավոր Արևելքում։
Պաշտոնյայի խոսքով՝ Մոսկվան կապի մեջ է ինչպես Իսրայելի, այնպես էլ Իրանի հետ։
«Իրանն օժտված է Իսրայելի խելագար հարձակումներից պաշտպանվելու բոլոր օրինական, լեգիտիմ և բնական իրավունքներով», - այսօր հայտարարել է Թուրքիայի նախագահ Ռեջեփ Էրդողանը։
Թուրքիայի նախագահի խոսքով, Իսրայելը Իրանին հարվածեց՝ «չսպասելով միջուկային համաձայնագրի շուրջ բանակցությունների ավարտին»։
«Իսկ Գազայում ցեղասպանության հարցում Նեթանյահուն գերազանցել է Հիտլերին», - եզրափակել է Էրդողանը։
Իրանի գերագույն հոգևոր առաջնորդ Ալի Խամենեին հայտարարել է՝ Իսրայելը մեծ սխալ է թույլ տվել և դրա համար կպատժվի:
«ժողովուրդը չի մոռանա իրենց տարածքի վրա հարձակումը», - «Մեհր» գործակալության փոխանցմամբ՝ ասել է Իրանի գերագույն հոգևոր առաջնորդը։
Իրանի պետական հեռուստատեսության եթերում հեռարձակված ուղերձում իսլամական հանրապետության գերագույն հոգևոր առաջնորդ այաթոլա Ալի Խամենեին նաև ասել է. «Միացյալ Նահանգների կողմից Իրանին հասցված ցանկացած հարված անդառնալի և ծանր հետևանք կունենա»։