Իսրայել-Իրան հակամարտությունն է՛լ ավելի է թեժանում. թարմացվող

Իրանի նավթի նախարարությունը հայտարարել է, որ Իսրայելի վերջին հարվածների ժամանակ տուժել է նաև Թեհրանում գտնվող Շահրանի նավթամբարը։ Նախարարության պաշտոնյան The New York Times-ին ասել է, որ պահեստում գտնվող 11 ռեզերվուարները պայթել են մեկը մյուսի հետևից։ Պահեստի անմիջական հարևանությամբ ապրող իրանցիներից մեկի խոսքով, պայթյունների ուժգնությունը երկրաշարժի տպավորություն է թողել, տեղում լայնածավալ կրակ է բռնկվել։ Պաշտոնյաները հավաստիացնում են, որ իրավիճակը վերահսկողության տակ է։

Գերմանիայի արտգործնախարարը հայտարարել է, որ Գերմանիան, Ֆրանսիան և Մեծ Բրիտանիան պատրաստ են անհապաղ բանակցություններ սկսել Թեհրանի միջուկային ծրագրի շուրջ՝ Մերձավոր Արևելքում իրավիճակը հանդարտեցնելու համար։

«Հուսով եմ՝ դա դեռ հնարավոր է, և մեր առաջարկը կընդունվի», - շաբաթ օրը ուշ երեկոյան գերմանական հեռուստատեսությանն ասել է արտգործնախարար Վադեֆուլը, հավելելով՝ «հիմնական նախապայմանն է, որ Իրանը որևէ վտանգ չներկայացնի ո՛չ տարածաշրջանի, ո՛չ Իսրայել պետության, ո՛չ էլ Եվրոպայի համար»։

ԱՄՆ Նախագահը սպառնում է Իրանին. «եթե Ամերիկան որևէ կերպ հարձակման ենթարկվի, մեր զինված ուժերի ողջ ուժն ու հզորությունը կհասնեն ձեզ այնպես, որ մինչ օրս չեք տեսել»,- Truth Social-ում գրել է Դոնալդ Թրամփը։

Սպիտակ տան ղեկավարը միաժամանակ պնդել է, թե նույնիսկ այս պահին Ամերիկան կարող է «հեշտությամբ գործարք կնքել Իրանի և Իսրայելի միջև և վերջ դնել այս արյունալի հակամարտությանը»։

Զոհեր ու վիրավորներ Իսրայելում՝ իրանական հարվածներից

Իսրայելի ոստիկանությունը հայտարարել է, որ Բաթ Յամում վեց մարդ զոհվել է, 180-ը՝ վիրավորվել, առնվազն 7 մարդ անհետ կորած է համարվում: Իշխանությունների տվյալներով՝ ևս չորս մարդ զոհվել է Իսրայելի հյուսիսում:

Իրանը չի ցանկանում, որ Իսրայելի հետ հակամարտությունը տարածվի դեպի հարևան երկրներ, բայց ստիպված է դիմել ինքնապաշտպանության, այսօր հայտարարել է երկրի արտգործնախարարը։

Աբբաս Արաղչին պնդել է՝ Իսրայելի վերջին հարձակումները նպատակ ունեին խափանել միջուկային ծրագրի շուրջ ԱՄՆ-ի հետ սկսված բանակցությունները, ընդգծելով. «Վաշինգտոնը պետք է դատապարտի Իսրայելի հարվածները Իրանի միջուկային օբյեկտների վրա»:

Իսրայելը տարհանման նախազգուշացում է տվել Իրանի միջուկային ռեակտորների մոտակայքում բնակվողներին։ X-ում պարսկերենով արված գրառման մեջ Իսրայելի պաշտպանության բանակի խոսնակը նշել է՝ «Բոլորը, որ գտնվում են ... ռազմական զենքի արտադրության գործարաններում, դրանց օժանդակ հաստատություններում կամ շրջակայքում, պետք է անհապաղ լքեն այդ տարածքները և չվերադառնան մինչև հետագա ծանուցում։ Ձեր ներկայությունը այս ենթակառուցվածքների կողքին վտանգի է ենթարկում ձեր կյանքը»։

Իսրայելի վրա գիշերը Իրանի իրականացրած հրթիռային հարվածների հետևանքով զոհերի թիվը հասել է 10-ի, հաղորդում են իսրայելական պաշտոնական աղբյուրները։

Ըստ Ոստիկանության տվյալների՝ Թել Ավիվից հարավ գտնվող Բաթ Յամ քաղաքում վեց մարդ է սպանվել, այդ թվում՝ երկու երեխա։ Յոթ մարդ անհետ կորած է համարվում։

Արտակարգ ծառայությունների տվյալներով՝ չորս մարդ էլ սպանվել է արաբական Թամրա քաղաքի վրա հարձակման հետևանքով։

Իսրայելում , ըստ BBC-ի, շատերն են ցնցված Իրանի կողմից իրականացված հրթիռային հարձակումների երկու ալիքներից, որոնց հետևանքով զոհվել է առնվազն 10 մարդ, այդ թվում՝ երկու երեխա։ Պաշտոնյաները վերջին ժամերին պարբերաբար հայտարարում են, որ առջևում դժվարին օրեր են սպասվում, և որ Իրանի դեմ հարձակումները կշարունակվեն, թերևս՝ մի քանի շաբաթ. «դրա վերջնական նպատակը, սակայն, մնում է անհայտ», փաստում են արևմտյան լրատվամիջոցները։

Երեկ երեկոյան Իսրայելի վարչապետ Նեթանյահուն սպառնացել է՝ մինչ օրս իրականացված հարվածները «ոչինչ են այն ամենի համեմատ, որ Իրանը կտեսնի առաջիկա օրերին»։

Վարչապետի քննադատները մինչդեռ պնդում են՝ դիվանագիտությունն է Իրանի միջուկային ծրագրի շուրջ տարաձայնությունները հարթելու միակ ճանապարհը։

Իսրայելի հարվածներից հետո Իրանը չեղարկեց ԱՄՆ-ի հետ բանակցությունների վեցերորդ փուլը, որը պետք է կայանար այսօր Օմանի մայրաքաղաքում։ Իրանի արտգործախարար Աբբաս Արաղչին այսօր ասել է, որ որևէ քննարկում չի լինի, քանի դեռ Իսրայելը «բարբարոսական հարձակումներ է իրականացնում»:

Առաջին լուսանկարները՝ Իսրայելի վրա Իրանի գիշերային հարվածներից հետո

Այս պահի տվյալներով, զոհվել է առնվազն 10 մարդ, վիրավորվել՝ ավելի քան 100-ը։