Իսրայելի նավթավերամշակման գործարանները հայտարարում են, որ Հայֆայում խողովակաշարեր ու փոխանցման գծեր են վնասվել իրանական հրթիռային հարձակումներից։
Իսրայելի պաշտպանության նախարար Իսրայել Կացը հայտարարել է, որ ինքն է հրահանգել տարհանման ծանուցումներ ուղարկել Թեհրանի այն բնակիչներին, որոնք ապրում են զենքի արտադրության գործարանների կամ միջուկային օբյեկտների մոտ՝ «նրանց իսկ անվտանգության համար»։
Ավելի վաղ Լիբանանում «Հեզբոլլահի» դիրքերը թիրախավորելիս ևս Իսրայելը նման ծանուցումներ էր ուղարկում տեղացիներին։ Զինվորականները, մասնավորապես, հաճախ նշում էին Բեյրութի այն շենքերը, որոնք հայտնվելու էին հարձակման թիրախում՝ հորդորելով մերձակայքում գտնվող բնակիչներին ժամանակավորապես լքել տարածքը։
«Իրանի բռնապետը Թեհրանը վերածում է Բեյրութի, իսկ Թեհրանի բնակիչներին՝պատանդառում իր ռեժիմի գոյատևման համար», - հայտարարել է Իսրայելի պաշտպանության նախարարը։
Թեհրանի փողոցներում սգո պաստառներ են՝ իսրայելական հարվածներից զոհված բարձրաստիճան զինվորականների լուսանկարներով
Իրանը հայտարարել է, որ ձերբակալել է Իսրայելի հետախուզական գործակալության՝ Մոսադի երկու գործակալների։ Ըստ կառավարամետ Tasnim լրատվական գործակալության, ձերբակալություններն իրականացվել են Ալբորզ նահանգում։ Այլ մանրամասներ առայժմ չեն հաղորդվել։
Իրանի պաշտոնյաներից մեկը BBC-ի հետ զրույցում հաստատել է, որ Իսրայելի վերջին հարվածներից տուժել է նաև Պաշտպանության նախարարության՝Սպահանի կենտրոնում գտնվող կենտրոնակայանը։
Սպահանի անվտանգության հարցերով փոխնահանգապետ Ակբար Սալեհին նշել է, որ մինչ այժմ զոհերի մասին չի հաղորդվել, ներկայումս գնահատվում է հասցված վնասը։
Իսրայելական Բաթ Յամ քաղաքը՝ Իրանի հարվածներից հետո.
Իսրայելի կառավարության տվյալներով՝ ուրբաթ օրվանից Իրանը մոտ 200 հրթիռ է արձակել Իսրայելի ուղղությամբ, 22 դեպքում դրանք հասել են իրենց թիրախներին՝ խուսափելով հակաօդային պաշտպանությունից։ Այսօր կեսօրի դրությամբ, իրանական հրթիռային հարվածներից Իսրայելում զոհվել է 13 մարդ, մոտ 400 մարդ վիրավորվել է, որոնցից 9-ը ծանր վիճակում են։
Իսրայելական «El Al Airlines» ընկերությունը մեկ շաբաթով՝ մինչև հունիսի 23-ը, չեղարկել է չվերթները դեպի Եվրոպայի բազմաթիվ քաղաքներ, ինչպես նաև Տոկիո և Մոսկվա։
Իրանի քաղաքացիական ավիացիայի կազմակերպությունն էլ, ըստ տեղական լրատվամիջոցների, երկարաձգել է չվերթների չեղարկումը մինչև երկուշաբթի՝ Երևանի ժամանակով ժամը 02:00-ը:
Ֆրանսիայի արտգործնախարարը հայտարարել է, որ Իրանի միջուկային ծրագիրը «գոյաբանական սպառնալիք է Իսրայելի և Եվրոպայի անվտանգության համար»։ Միաժամանակ, Ժան-Նոել Բարոն պնդել է, թե «այդ սպառնալիքը կանխելու, այն զսպելու լավագույն միջոցը դիվանագիտությունն է»։
Ավելի վաղ Գերմանիան, Ֆրանսիան և Մեծ Բրիտանիան հայտարարել էին, որ պատրաստ են անհապաղ բանակցություններ սկսել Իրանի հետ՝ Մերձավոր Արևելքում իրավիճակը լիցքաթափելու նպատակով։ Թեհրանն առայժմ չի արձագանքել։
Իրանը խնդրել է Կիպրոսին «որոշ ուղերձներ» փոխանցել Իսրայելին, հայտարարել է նախագահ Նիկոս Քրիստոդուլիդեսը, հավելելով, որ ակնկալում է օրվա ընթացքում խոսել այդ երկրի վարչապետ Նեթանյահուի հետ։
Քրիստոդուլիդեսը չի նշել, թե կոնկրետ ում կողմից են եղել ուղերձները կամ ինչ է ասվել դրանցում։ Հայտնի է միայն, որ երեկ երեկոյան Կիպրոսի արտգործնախարարը հեռախոսազրույց է ունեցել իր իրանցի գործընկերոջ հետ։
Ըստ նախագահի, Կիպրոսը նաև խնդրել է ԵՄ Արտաքին գործերի խորհրդի արտակարգ նիստ գումարել։
Մինչ Իսրայելն ու Իրանը շարունակում են փոխադարձ հարվածները, ամփոփենք՝
ինչ գիտենք և ինչ չգիտենք այս պահի դրությամբ։
Հայտնի է, որ գիշերը Իսրայելում իրանական հրթիռներից առնվազն 10 մարդ զոհվել է, ավելի քան 100-ը՝ վիրավորվել։ Իրանի պետական հեռուստատեսությունը երեկ հաղորդեց, որ Թեհրանում միայն մեկ բազմաբնակարան շենքի փլուզումից զոհվել է 60 մարդ, այդ թվում՝ 20 երեխա։
Իրանի նավթի նախարարությունը հայտնում է, որ մայրաքաղաքում գտնվող Շահրանի նավթամբարը նույնպես հայտնվել է իսրայելական հարվածների թիրախում։ Ըստ վերջին տեղեկությունների, չնայած տեղում լայնածավալ հրդեհ էր բռնկվել, նավթավերամշակման գործարանը շարունակում է գործել։ Այլ մանրամասներ իրանական աղբյուրները չեն հայտնում։
Տեղից BBC-ի լրագրողները հաղորդում են, որ իրանական պետական լրատվամիջոցները լայնորեն լուսաբանում են իրանական հարվածների հետևանքները, սակայն, սահմանափակ տեղեկություններ են տալիս Իրանի կրած վնասների մասին։