Իրանի Իսլամական հեղափոխության պահապանների կորպուսը զգուշացրել է, որ կսաստկացնի իր հարձակումները, եթե Իսրայելը շարունակի հարվածներ հասցնել Իրանին:
Պետական լրատվամիջոցների փոխանցմամբ, երկրի ամենաազդեցիկ ուժային կառույցը պնդել է, թե վերջին ժամերին թիրախավորել է Իսրայելի կործանիչների նավատորմի արտադրական օբյեկտները և վառելիքի մատակարարման ենթակառուցվածքները:
Իսրայելի զինված ուժերը, մինչդեռ, պնդում են, թե Իրանի հարվածների թիրախում են եղել քաղաքացիական բնակավայրերը:
Իսրայելը «մեկ վայրկյան անգամ» չի դադարեցնում Իրանի վրա հարձակումները, հայտարարել է ՊՆ խոսնակ, բրիգադի գեներալ Էֆի Դեֆրինը։
«Մենք այս պահին էլ շարունակում ենք հարվածել տասնյակ թիրախների Թեհրանում», - ասել է նա՝ այսօր կեսօրին հեռուստատեսությամբ հեռարձակված ելույթում՝ առանց հավելյալ մանրամասների։
Ավելի վաղ ռազմական գերատեսչության խոսնակը նշել էր, որ Իսրայելը դեռևս ունի Իրանում հարվածելու համար նախատեսված թիրախների մեծ ցանկ։ Թել Ավիվը, սակայն, դեռ չի հստակեցնում՝ Իրանի դեմ գործողությունները որքան են շարունակվելու։
Մեքենաների հերթը Թեհրանի բենզալցակայանի մոտ, հունիսի 15, 2025
Իրանում և Իսրայելում զոհերի շրջանում ՀՀ քաղաքացիներ լինելու վերաբերյալ տվյալներ այս պահին չկան, «Ազատությանը» փոխանցել են արտգործնախարարությունից։
Իրանը պատրաստ է շարունակել միջուկային համաձայնագրի շուրջ բանակցությունները, հայտարարել է արտգործնախարար Աբբաս Արաղչին։
«Մենք բաց ենք ցանկացած համաձայնագրի համար, որով Իրանը չի ստեղծի միջուկային զենք։ Սակայն մենք չի ընդունի որևէ համաձայնագիր, որը զրկում է Իրանին իր միջուկային իրավունքներից, այդ թվում՝ ուրանը հարստացնելու իրավունքից», հավելել է նա։
Իսրայելական հեռուստաալիքները ուղիղ եթերում ցուցադրում են Թեհրանի կենտրոնում տեղի ունեցած նոր պայթյունների կադրեր, որոնցում ծխի մեծ ամպեր են բարձրանում մոտ վեց վայրերից:
Իրանական աղբյուրները դեռ հաղորդագրություն չեն տարածել։ Իսրայելական զինվորականները նշում են միայն, որ տեղում «գործողությունները շարունակվում են»՝ առանց հավելյալ մանրամասների:
«Իրանը որևէ հաղորդագրություն չի ուղարկել Իսրայելին երրորդ երկրի միջոցով»,- հայտարարել է երկրի արտգործնախարարության խոսնակը՝փաստացի հերքելով Կիպրոսի նախագահի հայտարարությունը, թե Թեհրանը խնդրել է Նիկոսիային «որոշ ուղերձներ» փոխանցել Իսրայելին։
Իրանը և Իսրայելը «շուտով կհասնեն խաղաղության», հայտարարել է ԱՄՆ նախագահը՝ հավելելով, որ այժմ ընթանում են հանդիպումներ։ Թե կոնկրետ ում միջև և որտեղ՝ Դոնալդ Թրամփը չի հստակեցրել, բայց պնդել է, որ «երկու երկրները պետք է համաձայնության գան»։
Ով է գլխավորելու Իսլամական հեղափոխության պահապանների կորպուսը
Իրանը հայտարարել է, թե այսուհետ երկրի ամենաազդեցիկ ուժային կառույցը՝ Իսլամական հեղափոխության պահապանների կորպուսը, կգլխավորի գեներալ Ահմադ Վահիդիին։ Նրա նախորդը՝ գեներալ Հոսեյն Սալամին, սպանվեց ուրբաթ՝ Իսրայելի առաջին օդային հարվածների ժամանակ։
Գեներալ Վահիդին Իրանից դուրս առավել հայտնի է որպես 1994 թվականին Բուենոս Այրեսի հրեական մշակութային կենտրոնի ռմբակոծության կազմակերպիչ, ահաբեկչություն, որի հետևանքով զոհվել էր 85 մարդ, հարյուրավորները՝ վիրավորվել։
Արգենտինայի դատախազները հինգ իրանցի պաշտոնյաների, այդ թվում՝ գեներալ Վահիդիին ձերբակալելու օրդեր էին տվել ՝ հարձակումը «պլանավորելու, ֆինանսավորելու և իրականացնելու» համար։
Գեներալը ծնվել է 1958 թվականին Իրանի կենտրոնական Շիրազ քաղաքում։ 1979 թվականի իրանական հեղափոխության ժամանակ նա ուսանող էր Շիրազի համալսարանում և մոտավորապես այդ ժամանակ էլ միացել է Իսլամական հեղափոխության պահապանների կորպուսին։ Ավելի ուշ նա ստացել է ռազմավարական ուսումնասիրությունների դոկտորի կոչում։
1980 թվականին սկսված և ութ տարի շարունակված իրանա-իրաքյան պատերազմի ընթացքում Վահիդին զբաղեցրել է մի շարք բարձրաստիճան պաշտոններ անվտանգության ոլորտում։ 1988 -ից՝ մոտ տասը տարի, ղեկավարել Կորպուսի հատուկ նշանակության «Քուդս» խմբավորումները, որոնք մասնագիտացած են հետախուզության և Իրանից դուրս իրականացվող գործողությունների մեջ։
2005 թվականից գեներալ Վահիդին ծառայել է որպես պաշտպանության փոխնախարար, 2009 թվականին նշանակվել պաշտպանության նախարար՝ պաշտոնավարելով մինչև 2013 թվականը։ Նա նաև երեք տարի եղել է Իրանի ներքին գործերի նախարար՝ մինչև անցյալ տարվա օգոստոսը։
Միացյալ Նահանգները, Եվրամիությունը, Կանադան և Մեծ Բրիտանիան պատժամիջոցներ են կիրառել գեներալի նկատմամբ՝ մարդու իրավունքների խախտումների համար։
Իրանի առողջապահության նախարարությունը հայտարարել է, որ անցած երեք օրերի իսրայելական հարվածների հետևանքով Իրանում զոհվել է առնվազն 128 մարդ, վիրավորվել՝ ավելի քան 900-ը։
