Ուկրաինայում ռուսական ուժերի դեմ կռվող «Վրացական լեգիոնը» ևս մեկ մարտիկ է կորցրել՝ զոհվել է ջոկատի հրամանատար Զաքարիա Շուբիտիձեն։
Այս մասին հայտնել է «Վրացական լեգիոնի» հրամանատար Մամուկա Մամուլաշվիլին։
Ըստ վրացական լրատվամիջոցների՝ Ուկրաինայում 40-ից ավելի վրացիներ են զոհվել։ Նրանց մի մասը կամավոր է պատերազմ մեկնել, մի մասը վաղուց ապրում էր Ուկրաինայում։
Լվովի վրա անօդաչու թռչող սարքի զանգվածային հարձակման հետևանքով երեք հարված է հասցվել արդյունաբերական պահեստներին:
Ավելի վաղ քաղաքային իշխանությունները հայտնել էին մեկ պահեստում հրդեհի և երկու տուժածների մասին։
Տուժածներից մեկն այդ պահին պահեստում գտնվող 26-ամյա երիտասարդ է, ով հոսպիտալացվել է։ Տուժել է նաև մի կին: Պահեստներում բռնկված հրդեհները դեռ վերջնականորեն չեն մարվել։
Տեղական իշխանությունները հաղորդում են, որ Լվովի շրջանի ուղղությամբ ընդհանուր առմամբ թռչում էր 18 կամիկաձե անօդաչու թռչող սարք, որոնցից 15-ը խոցվել է։
Ուկրաինայի ռազմաօդային ուժերն ավելի վաղ հայտնել էին, որ Ուկրաինայում գիշերային հարձակմանը մասնակցել է 30 անօդաչու թռչող սարք, որոնցից 27-ը ոչնչացվել է։
Ռուս զինվորականները դեռ չեն մեկնաբանել գիշերային հարձակումը։
Ուկրաինայի նախագահ Վլադիմիր Զելենսկին կրկին հայտարարել է, թե Ուկրաինան իր տարածքներից ոչ մի կտոր չի հանձնի Ռուսաստանին խաղաղության դիմաց։
Ամերիկյան CBS հեռուստաընկերության լրագրողը Ուկրաինայի նախագահին հարցրել է, թե կարո՞ղ են զիջել որոշ տարածքներ հանուն խաղաղության: Ի պատասխան նա ասել է. - «Ոչ, սա մեր տարածքն է»։
«Դուք ուզո՞ւմ ամեն ինչ հետ վերցնել», - շարունակել է լրագրողը։
«Ի՞նչ պետք է ասեմ մարդկանց, որ նրանք բոլորը մահացել են, որպեսզի ես ասեմ՝ «Ռուսաստան, կարո՞ղ ես խլել սա»: Ես կարող եմ մարդկանց միայն հաղթանակ տալ», - արձագանքել է Զելենսկին:
Վերջին ամիսներին Արևմուտքում խոսում են ուկրաինական հակահարձակման դանղդաղման մասին և հայտարարում, թե պատերազմն այս տեմպերով կարող է շատ երկար տևել։
Զելենսկին համաձայնում է, որ առաջխաղացումը սպասվածից դանդաղ է, բայց կենտրոնանում է հաջողությունների վրա։
«Դա բարդ իրավիճակ է, ես Ձեզ հետ միանգամայն անկեղծ կլինեմ: Պլյուսն այն է, որ նախաձեռնությունը մերն է ճակատում։ Դա շատ կարեւոր է. մեր զինվորականները կասեցրին ռուս օկուպանտի առաջխաղացումը և անցան հարձակման։ Եվ չնայած սրան՝ շարժումն այնքան էլ արագ չէ։ Բայց կարևոր է, որ մենք ամեն օր առաջ գնանք», - ասել է նա։
Ուկրաինայի նախագահն ընդգծել է, որ ուկրաինական զորքերը պետք է անդադար առաջ շարժվեն, նույնիսկ եթե խոսքը հարյուրավոր մետրերի մասին է։
«Մենք չպետք է Պուտինին ընդմիջում տանք», - շեշտել է Զելենսկին։
Նա նաև վստահեցրել է, որ Ուկրաինայի զինված ուժերի հարձակումը կախված չէ եղանակից, ինչպես վախենում են Արևմուտքում՝ զգուշացնելով, որ հարձակման համար հարմար եղանակը մեկուկես ամիս կտևի միայն, մասնավորապես նման հայտարարություն երեկ արել էր ԱՄՆ Միացյալ շտաբերի ղեկավար Մարկ Միլին։
Ուկրաինական հակահարձակումը սկսվել էր հունիսին, այս երկու-երեք ամիսների ընթացքում ուկրաինացիներին հաջողվել է ազատագրել, համաձայն պաշտպանության փոխնախարար Աննա Մալյարի տվյալների, ավելի քան 260 քառակուսի կմ տարածք ճակատի հարավում և 51 քառ Բախմուտի ուղղությամբ։
Սա այն դեպքում, երբ ռուսները կարողացել են հսկայական պաշտպանական գծեր կառուցել, այդ թվում՝ աննախադեպ չափերի ականապատ դաշտեր։ Հարավում ուկրաինական իշխանությունների տվյալներով՝ ուկրաինական ուժերը մի քանի տեղում ճեղքել են ռուսական պաշտպանության գոնե առաջին գիծը։
Անցած շաբաթ Ուկրաինայի իշխանությունները հայտարարել են Բախմուտի մոտ երկու բնակավայրերի՝ Անրդեևկայի և Կլիեևկայի ազատագրման մասին։
Ռուսական զորքերի կողմից օկուպացված Դոնեցկում հրետակոծության հետևանքով հրդեհ է բռնկվել անջատողականների առաջնորդ Դենիս Պուշիլինի նստավայրում։
Ռուսաստանի կողմից նշանակված քաղաքային վարչակազմի ղեկավար Ալեքսեյ Կուլեմզինը հայտնել է, որ ուկրաինացի զինվորականները քաղաքի կենտրոնը թիրախավորել են հրթիռային կայանքներից։ Կիևը չի մեկնաբանել այդ մեղադրանքները։
Զոհերի և վիրավորների մասին տեղեկություններ չկան։
Ուկրաինայի պատերազմում զոհվել է Ռուսաստանի զինված ուժերի 31-րդ օդային հարձակման բրիգադի հրամանատար, գնդապետ Անդրեյ Կոնդրաշկինը։ Այս մասին հայտարարել է Դոնեցկի «Վոստոկ» գումարտակի հրամանատար Ալեքսանդր Խոդակովսկին:
Կոնդրաշկինի մահվան հանգամանքները, սակայն, հայտնի չեն։ Ռուսաստանի ռազմական գերատեսչությունը ևս չի մեկնաբանել օդուժի բարձրաստիճան սպայի մահը:
Ուկրաինական լրատվամիջոցների համաձայն՝ Կոնդրաշկինի գլխավորած զինված ստորաբաժանումը վերջին շրջանում մասնակցել է Բախմուտի մոտ՝ մասնավորապես Անդրեևկա գյուղի մերձակայքում ծավալված մարտերին:
Կիևն ուրբաթ օրը հայտարարել է ուկրաինական ուժերի կողմից Անդրեևկայի ազատագրման մասին, ռուսաստանյան պաշտոնական աղբյուրները մինչ այս պահը չեն հաստատել այդ լուրը:
Ուկրաինայի ռազմաօդային ուժերը հայտնում են, որ գիշերը երկրի տարածքը հարձակման է ենթարկվել 24 կամիկաձե անօդաչու թռչող սարքերի և 17 թևավոր հրթիռների կողմից։
Գիշերը տեղեկություններ էին ստացվել պայթյունների մասին Օդեսայի մարզում, որտեղ գրեթե ամեն օր հարձակումներ են տեղի ունենում, ինչպես նաև Խմելնիցկի շրջանում։
Ուկրաինայի ռազմաօդային ուժերը պնդում են, որ ոչնչացրել են բոլոր 17 թևավոր հրթիռները, որոնք արձակվել են Վոլգոգրադի շրջանի օդանավակայանից թռիչք կատարած ռազմավարական ռմբակոծիչներից: Նաև խոցվել են 24 գրոհային անօդաչու թռչող սարքերից 18-ը։
Ռուսաստանի պաշտպանության նախարարությունը չի մեկնաբանել Ուկրաինայի դեմ գիշերային հարվածները։
ՌԴ ռազմական գերատեսչությունը հայտնել է, որ երեկ Մոսկվայի ժամանակով մոտավորապես ժամը 21:30 Ղրիմում ոչնչացվել է ուկրաինական ինքնաթիռի տիպի անօդաչու թռչող սարք։
Մինչ այդ գերատեսչությունը հայտնել էր կիրակի երեկոյան Ղրիմի հարավ-արևմտքում ուկրաինական ևս երկու անօդաչու թռչող սարքի խոցման և Բելգորոդի շրջանում մեկ անօդաչուի վնասազերծման մասին:
Կիրակի երեկոյան Ղրիմի թելեգրամյան ալիքները հաղորդել են բռնակցված Սևաստոպոլի Ֆիոլենտ հրվանդանի տարածքում պայթյունների մասին։
Ըստ հաղորդումների՝ այնտեղ տեղակայված են ռուսական ռազմական ռադիոհետախուզության և հակաօդային պաշտպանության ստորաբաժանումներ։
Ռուսաստանի պաշտպանության նախարարությունը հայտարարել է, որ Ղրիմի հարավ-արևմտյան մասում անօդաչու սարքեր են խոցվել։
Պայթյունների մասին հաղորդում են թե ռուսամետ, թե ուկրաինամետ ալիքները։ «Ղրիմի քամի» ալիքը հրապարակել է դեպքի հետևանքների լուսանկար, որտեղ երևում է ծուխ հավանաբար հրդեհից։ Հղում անելով տեղի բնակիչներին՝ հեռուստաալիքը գրում է նաև մի շարք տարածքներում ծխի հոտի մասին։
ՄԱԿ-ի գլխավոր քարտուղար Անտոնիու Գուտերեշը նամակ է հղել Ռուսաստանի արտգործնախարար Սերգեյ Լավրովին՝ հացահատիկի սևծովյան գործարքը վերսկսելու կոնկրետ առաջարկների փաթեթով։
Գուտերեշի խոսքով՝ ՄԱԿ-ը «հաշվի է առել Ռուսաստանի խնդրանքները»։
«Մենք ունենք խնդիրների կոնկրետ լուծումներ, որոնք թույլ կտան մեզ ապահովել ռուսական պարենային ապրանքների և պարարտանյութերի ավելի արդյունավետ մուտք դեպի համաշխարհային շուկաներ համապատասխան գներով», - ընդգծել է նա։
Գուտերեշի կարծիքով՝ ՄԱԿ-ը «առաջարկ է ներկայացրել, որը կարող է հիմք հանդիսանալ գործարքի վերականգնման համար, բայց այնպեսի վերականգնման, որն այն ավելի կայուն կդարձնի»:
Արևմտյան վերլուծաբանները վերջին շաբաթներին նշում են, թե ուկրաինական հակահարձակումը հարավում, որը համարվում է հակահարձակման հիմնական ուղղությունը, դանդաղել է։
«Այս ֆոնին Արևմուտքում սկսել են խոսել այն մասին, որ ուկրաինական պատերազմը կարող է երկար տևել։ Ուկրաինան հակահարձակման ընթացքում որոշ հաջողությունների է հասել, սակայն հակահարձակման համար սահմանափակ ժամանակ ունի», - BBC-ին տված հարցազրույցում մասնավորապես ասել է ԱՄՆ Զինված ուժերի միացյալ շտաբի ղեկավար Մարկ Միլին՝ Միացյալ Նահանգների ամենաբարձրաստիճան ռազմական պաշտոնյան:
«Ուկրաինացիները շատ հետևողական նվաճումներ են գրանցել և պահպանել մարտական հզորությունը: Դեռ ժամանակ կա՝ հավանաբար 30-45 օր, մարտական եղանակի համար: Սա նշանակում է, որ ուկրաինացիները դեռ չեն ավարտվել հակահարձակումը», - ասել է ամերիկացի գեներալը՝ հավելելով, թե դեռ վաղ է ասել՝ ինչպես կավարտվի ուկրաինացիների այս հակահարձակումը:
Միաժամանակ, Միլին շեշտել է, թե ուկրաինական պատերազմի արագ ավարտը քիչ հավանական է։ Ուկրաինայի հաղթանակը հակամարտությունում «շատ բարձր նշաձող է», և «շատ երկար ժամանակ կպահանջվի», - ասել է նա։
Կիևում հաճախ են շեշտում, թե հարձակողական գործողությունների դանդաղումը մեծապես պայմանավորված է ոչ թե եղանակով, այլ՝ տեխնիկայի և զինամթերքի պակասով: Ուկրաինայի իշխանություններն էլ են ասում, թե հասկանում են, որ պատերազմը կարող է շատ երկար տևել, սակայն կրկին ու կրկին հայտարարում են, թե բանակցություններ ռուսական կողմի հետ հնարավոր են միայն այն դեպքում, երբ ռուսները համաձայնեն դուրս հանել իրենց զորքերն Ուկրաինայի տարածքից:
Երեկ Ուկրաինայի պաշտպանության նախարարությունը, հետո էլ՝ նախագահը, հաստատեցին Բախմուտի մոտ գտնվող Կլեշչիևկա գյուղի ազատագրումը:
«Իսկ այսօր հատկապես ուզում եմ նշել այն զինվորներին, ովքեր քայլ առ քայլ վերադարձնում են մեր Ուկրաինան՝ հենց Բախմուտի շրջանում», - հայտարարեց Վլադիմիր Զելենսկին:
Օրեր առաջ էր ազատագրվել էր մեկ այլ գյուղ Բախմուտի մոտ՝ Անդրեևկան:
Կատաղի մարտերը Բախմուտի մոտ արդեն մի քանի ամիս է ինչ շարունակվում են, վերլուծաբաննները գրում են, թե Կլեշչիևկայի ազատագրումը չափազանց կարևոր քայլ է քաղաքն ազատագրելու ճանապարհին: