Իրանը ՄԱԿ-ում հայտարարել է՝ Իսրայելի հարվածների հարցում երրորդ երկրների ցանկացած օժանդակություն ու համագործակցություն «նրանց դարձնում է այս ճգնաժամի իրավական պատասխանատվության և հետևանքների մասնակից»։
Կոնկրետ երկրների անուններ, սակայն, Թեհրանի պաշտոնական ներկայացուցիչը չի տվել:
ԱՄՆ նախագահ Դոնալդ Թրամփը սոցիալական մեդիայում գրառմամբ հորդորել է Թեհրանի բնակիչներին անմիջապես լքել քաղաքը։
«Իրանը պետք է ստորագրած լիներ «այդ համաձայնագիրը»։ Ես նրանց ասել էի՝ ստորագրեք։ Ինչ ամոթ է ու ինչ անիմաստ մարդկային կորուստ։ Պարզ ասած՝ ԻՐԱՆԸ ՉԻ ԿԱՐՈՂ ՈՒՆԵՆԱԼ Միջուկային ԶԵՆՔ։ Ես դա ասել եմ նորից ու նորից», - գրել է Թրամփը Truth Social հարթակում, - «Բոլորը պետք է անմիջապես տարհանվեն Թեհրանից»։
Երեքշաբթի վաղ առավոտյան Թեհրանում պայթյուններ են հնչել, արձանագրվել է ինտենսիվ հակաօդային պաշտպանություն, հաղորդում են իրանական լրատվամիջոցները։ Asriran լրատվական կայքի տվյալներով՝ հակաօդային համակարգերն ակտիվացել են նաև Նաթանզ քաղաքում, ուր տեղակայված են Իրանի առանցքային միջուկային օբյեկտները՝ Թեհրանից մոտ 320 կմ հեռավորության վրա։
Իսրայելում կեսգիշերից հետո օդային տագնապի ազդանշաններ են հնչել Թել Ավիվում: Լսվել է նաև պայթյունի ձայն:
«Մեծ յոթնյակը» (Մեծ Բրիտանիա, Կանադա, Ֆրանսիա, Գերմանիա, Իտալիա, Ճապոնիա և ԱՄՆ) երկուշաբթի տարածած հայտարարությամբ շեշտել է, որ Իրանը չպետք է երբևէ ունենա միջուկային զենք, իսկ Իսրայելն ունի ինքնապաշտպանվելու իրավունք։
Իսրայելի զինված ուժերը պնդում են, որ սպանել են Ալի Շադմանիին, ում ներկայացրել են որպես Իրանի պատերազմի ժամանակ գլխավոր շտաբի պետ և նշել, որ նա եղել է իրանական բանակի ամենաբարձրաստիճան սպան։ Թեհրանը չի հաստատել այս տեղեկությունը:
ԱՄՆ պաշտպանության նախարար Փիթ Հեգսեթը երկուշաբթի օրը Fox News-ին ասել է, որ նախագահ Դոնալդ Թրամփը, չնայած ԱՄՆ դաշնակից Իսրայելի և Թեհրանի միջև սրացած լարվածությանը, դեռ նպատակ ունի Իրանի հետ միջուկային համաձայնության հասնել։
Հարցին, թե արդյոք Թրամփը շարունակում է ձգտել միջուկային գործարքի, Հեգսեթը պատասխանել է. «Իհարկե»։
Նավթի գները բարձրացել են՝ պայմանավորված Իրանի և Իսրայելի միջև հակամարտության սրացման մտավախությամբ:
Brent տեսակի նավթի հուլիսյան ֆյուչերսներն աճել են 34 ցենտով կամ 0.5 տոկոսով՝ հասնելով մեկ բարելի դիմաց 73.57 դոլարի։ ԱՄՆ West Texas Intermediate (WTI) տեսակի նավթը բարձրացել է 29 ցենտով կամ 0.4 տոկոսով՝ կազմելով 72.06 դոլար։
Մինչ աշխարհի ուշադրությունը կենտրոնացած է Իրանի ու Իսրայելի միջև հակամարտության վրա, Իսրայելը հրթիռակոծել է Գազայում օգնության բաշխման կետի մերձակայքը, որտեղ հազարավոր պաղեստինցիներ էին հավաքվել՝ հաց ու ալյուր ստանալու հույսով։ «Համաս»-ի կողմից ղեկավարվող առողջապահության նախարարությունը հայտնում է, որ զոհվել է 45 մարդ, կան բազմաթիվ վիրավորներ։
Ըստ իրանական լրատվամիջոցների՝ տեղի բանկերից մեկը ենթարկվել է կիբերհարձակման:
Ըստ Fars լրատվական գործակալության՝ Sepah Bank-ի առցանց համակարգը կաթվածահար է եղել, ինչը կարող է խնդիրներ առաջացնել նաև բենզալցակայաններում, քանի որ դրանք միացված են բանկային համակարգին։
Sepah Bank-ն Իրանի ամենահին բանկերից մեկն է և գտնվում է արևմտյան պատժամիջոցների տակ։
Մինչ այդ իրանցիներն արևմտյան լրատվամիջոցներին տեղից պատմել էին, որ ցանկանում են լքել երկիրը, սակայն չեն կարողանում գումար հանել բանկերից կամ բենզին հայթայթել։
Միացյալ Նահանգների նախագահը հայտարարել է, թե Իրանում պետք է ոչ թե ժամանակավոր հրադադար հաստատել, այլ՝ «իրական վերջ դնել» Թեհրանի միջուկային ծրագրին։
Չնայած մինչ այդ Սպիտակ տան ղեկավարը ակնարկել էր, որ ընթանում են բանակցություններ, և շուտով խաղաղություն կհաստատվի, այսօր հերքել է տեղեկությունները, որ աշխատում է Իրանի և Իսրայելի միջև հրադադարի հասնելու ուղղությամբ։