Թեհրանում Չեխիայի դեսպանատունը ժամանակավորապես փակվում է՝ շարունակվող հակամարտության պատճառով, հայտնել է Չեխիայի արտգործնախարարը։
Թրամփը երկու շաբաթվա ընթացքում որոշում կկայացնի՝ արդյոք ԱՄՆ-ը կներգրավվի Իսրայել-Իրան հակամարտության մեջ
Սպիտակ տան մամուլի քարտուղարը հայտնել է, որ ԱՄՆ նախագահ Դոնալդ Թրամփն առաջիկա երկու շաբաթվա ընթացքում որոշում կկայացնի, թե արդյոք Միացյալ Նահանգները կներգրավվի Իսրայել-Իրան հակամարտության մեջ:
Գերմանիայի կանցլերը հեռախոսազրույց է ունեցել Իսրայելի վարչապետի հետ, կոչ արել՝ «ավելի մեղմ լինել Իրանի դեմ ռազմական արշավում», հայտնում է «Ռոյթերսը»։
«Ռոյթերս»-ի փոխանցմամբ՝ Ֆրիդրիխ Մերցը զրույցի ընթացքում արտահայտել է իր «սկզբունքային աջակցությունը» Իսրայելի կողմից Իրանի միջուկային ծրագրի դեմ գործողությանը, բայց նաև ընդգծել է հակամարտության դիվանագիտական լուծումներ գտնելու կարևորությունը։
Ավելի վաղ Գերմանիայի կանցլերը հայտարարել էր, թե «խորը հարգանք» է տածում Իսրայելի բանակի և քաղաքական ղեկավարության նկատմամբ, որոնք քաջություն ունեին հարձակվելու Իրանի վրա։ Այդ հայտարարությունից հետո՝ երեկ Թեհրանում Գերմանիայի դեսպանը կանչվել էր Իսլամական Հանրապետության արտաքին գործերի նախարարություն:
Վերջին 24 ժամվա ընթացքում Իսրայելը հարձակվել է Թեհրանում գտնվող Ներքին անվտանգության հատուկ նշանակության ուժերի շտաբի վրա, հայտարարել է Իսրայելի բանակի խոսնակը։
Իրանում կապի խնդիրներ կան
Իրանում արդեն շուրջ 24 ժամ է՝ ինտերնետային կապ չկա, պատերազմի մեջ հայտնված իրանցիները զրկված են արտաքին աշխարհի հետ կապից։ Ինտերնետային մոնիթորինգի NetBlocks խումբը նշել է, որ սա ինտերնետի՝ 2019 թվականին երկրում տեղի ունեցած բողոքի ցույցերից ի վեր գրանցված ամենալուրջ խափանումն է։
«Իրանի զինված ուժերը կշարունակեն հարվածել մեր ժողովրդին թիրախավորող «հանցագործներին» այնքան, մինչև նրանք չդադարեցնեն դա և չվճարեն մեր ազգի դեմ ուղղված իրենց «հանցավոր ագրեսիայի» համար», - X-ում գրել է Իրանի ԱԳ նախարար Աբբաս Արաղչին։
Նախարարը գրել է նաև, որ կոչ են անում իսրայելցիներին հետևել իրենց տարհանման հրամաններին և խուսափել ռազմական և հետախուզական օբյեկտներին մոտ լինելուց։
Իրանի պետական լրատվամիջոցները կադրեր են հրապարակել Խոնդաբիի շրջանից, որտեղ՝ Արաքում, ծանր ջրային ռեակտոր կա․ տեսանյութում երևում է, որ տեղում հրդեհ է բռնկվել։ Պաշտոնյաները պնդում են, որ ռեակտորն ավելի վաղ տարհանվել է, և ճառագայթման վտանգ չկա։
Ծանր ջուրն օգնում է սառեցնել միջուկային ռեակտորները, միաժամանակ, այն նաև արտադրում է պլուտոնիում, որը կարող է օգտագործվել միջուկային զենք արտադրելու համար:
Իսրայելում Իրանի հարվածների հետևանքով վիրավորվածների թիվը հասել է 240-ի, նրանցից 4-ը լուրջ վիրավորումներ է ստացել, հաղորդել է Իսրայելի առողջապահության նախարարությունը:
«Ազատություն»-ն ամփոփել է Իսրայել-Իրան հակամարտության վերջին լուրերը:
