- Հեղինակ՝ Հրաչ Մելքումյան
Ուկրաինա ներխուժելու երկրորդ օրը ռուսական դիվերսիոն խմբերն ու զրահատեխնիկան թափանցել են Կիևի թաղամասերից մեկը։ Այդ մասին պաշտոնապես հաղորդել է Ուկրաինայի պաշտպանության նախարարությունը՝ բնակիչներին կոչ անելով զգուշություն ցուցաբերել, տեղեկություններ փոխանցել հակառակորդի ռազմական տեխնիկայի տեղաշարժի ուղղությունների մասին։
Մայրաքաղաքի հյուսիսային մասում ընկած Օբոլոն թաղամասում, ականատեսների վկայությամբ փողոցներում, շենքերի բակերում ռուսական զրահամեքենաներ կան, կրակոցներ են լսվում։
Ուկրաինայի ներքին գործերի նախարարի խորհրդական Անտոն Գերաշչենկոյի ասելով՝ ուկրաինացի զինվորականները Կիևում ռուսական դիվերսիոն մի խումբ են չեզոքացրել։ Ռուսաստանի ՊՆ-ը դեսանտայիններին կորցնելու լուրը չի հաստատում։
- Հեղինակ՝ Լուսինե Մուսայելյան
Կիևի քաղաքապետ Վիտալի Կլիչկոն հայտարարել է, որ Ուկրաինայի մայրաքաղաքը թևակոխել է պաշտպանության փուլ։
«Իրավիճակը բարդ է, բայց մենք հավատում ենք մեր զինված ուժերին», - հավելել է Կիևի քաղաքապետը՝ մայրաքաղաքի բնակչությանը խնդրելով մնալ տներում, թաքստոցներում և սննդամթերք կուտակել։
- Հեղինակ՝ Լուսինե Մուսայելյան
ՄԱԿ-ի տվյալներով՝ Ուկրաինայում գնդակոծությունների և օդային հարվածների հետևանքով զոհվել է առնվազն 25 խաղաղ բնակիչ, վիրավորվել՝ 102 մարդ։
Կազմակերպությունը նշում է, որ այս տվյալները, ամենայն հավանականությամբ, հեռու են իրականությունից, վիրավորների ու զոհերի թիվը կարող է շատ ավելի մեծ լինել։
- Հեղինակ՝ Լուսինե Մուսայելյան
Ռուսաստանը պատրաստ է պատվիրակություն ուղարկել Մինսկ Ուկրաինայի հետ բանակցելու համար, այս մասին հայտարարել է Կրեմլի խոսնակ Դմիտրի Պեսկովը։
Կրեմլի խոսնակը նշել է, որ ռուսաստանյան պատվիրակության կազմում կլինեն պաշտպանության և արտաքին գործերի նախարարությունների, ինչպես նաև նախագահի աշխատակազմի ներկայացուցիչներ։
- Հեղինակ՝ Հրաչ Մելքումյան
Ռուսաստանի ներխուժումից հետո ավելի քան 50 հազար մարդ դուրս է եկել Ուկրաինայից։ Այս մասին Թվիթերյան գրառմամբ տեղեկացնում է ՄԱԿ-ի փախստականների հարցերով գերագույն հանձնակատար Ֆիլիպո Գրանդին։
«Ավելի քան 50 հազար ուկրաինացի փախստականներ դուրս են եկել իրենց երկրից վերջին 48 ժամվա ընթացքում, մեծ մասը Լեհաստան ու Մոլդովա», - գրել է նա, նշելով, որ ավելի մեծ քանակի մարդիկ շարժում են դեպի սահմաններ։
Կիևում հրթիռակոծվել է բնակելի բազմահարկ շենք: Ուկրաինայի արտակարգ իրավիճակների պետական ծառայությունը հայտնում է, որ տուժել է վեց մարդ։
Կիևի քաղաքապետ Վիտալի Կլիչկոն նշել է, որ շենքը գտնվում է Լոբանովսկի պողոտայում՝ Ժուլյանի օդանավակայանից չորսուկես կիլոմետր հեռավորության վրա։
Անհրաժեշտ է որոշում կայացնել ԵՄ-ին Ուկրաինայի անդամակցության վերաբերյալ: Այս մասին իր թվիթերյան էջում գրել է նախագահ Վլադիմիր Զելենսկին:
Զելենսկին հավելել է, որ Եվրախորհրդի նախագահ Շառլ Միշելի հետ քննարկել է Ուկրաինային հետագա օգնության հարցը։